أخر الأخبار

لازمتها اية الكماين الثابتة ؟؟

 

كتبت عزة الجراح ..

– ايه فايدة الكماين الثابتة؟
= الكماين الثابتة هدفها السيطرة على الطرق والمحاور واحتلال الارض.. لو سبت الارض حد غيرك حييجى يحتلها ويسيطر على الطرق..

– ليه منعملش الكمين فى مكان غير معروف؟
= بقولك الكمين هدفه السيطرة على الطرق، يعنى الكمين اساسا اتعمل على طريق قائم وبيعدى فيه عربيات كتير على مدار اليوم.

– اللى بيقفوا فى الكماين معندهمش واسطة..
= مش حقيقى .. اللى قال لك كدة كداب عايز يسخنك.. الخدمة فى الكمين بالدور وبتعدى على الناس كلها وفى كتير من المصابين والشهداء بيبقوا ابناء وزراء وقادة كبار..

– ليه مفيش دعم اتحرك؟
= فى دعم اتحرك وانضرب عليه نار فى الطريق وعشان كدة وصل متأخر بعد ما خلص تعامل مع المجموعة اللى هاجمته..

– ازاى الكمين يسقط بالسهولة دى؟
= مفيش كمين فى الكون عصى عن الاسقاط طالما القوات المهاجمة اكبر من القوات المدافعة واسألوا خط بارليف.. والكمين مسقطش بسهولة، الرجالة دافعت عن الأرض ببسالة ..

– كانت فين المخابرات؟
= مش عارف مين اللى فهمك ان المخابرات بتقدر تتنبأ بأى حاجة قبل ما تحصل .. عادى مش شرط تعرف قبل كل حادثة، ساعات بتعرف وساعات لأ.. الارهابيين دول بيحركهم مخابرات دول وعندهم وسائل خداع حديثة.. و لما المخابرات بتعرف معلومات عن تحركات مريبة الجيش بيطلع يصفيها اول بأول.. المهم لما تسمع عن عملية عسكرية فى شمال سينا ابقى اعرف لوحدك ان المخابرات جابت معلومات والجيش بيتحرك عشان يخلص ..

– ليه مفيش كاميرات بتراقب المنطقة اللى قبل الكمين؟
= حضرتك فى كاميرات بتراقب كل شبر فى شمال سينا وخصوصا حوالين الكماين .. بس الارهابيين مش ماسكين يافطة مكتوب عليها احنا ارهابيين.. دول ناس عاديين لابسين مدنى وراكبين عربية عادية ومبنعرفش انهم ارهابيين غير مع اول رصاصة تطلع..

– ليه مفيش غطاء جوى يطلع بسرعة يدعم الكمين اللى بيتهاجم؟
= بيحصل و بيطلع دعم جوى والارهابيين بينهوا العملية بمجرد ما يسمعوا صوت الطيارات وبيهربوا من المكان سواء خلصوا على افراد الكمين او لسة فى حد عايش .. وعشان كدة بيختاروا يهجموا على كماين بعيد عن المطارات عشان يبقى عندهم وقت قبل وصول الدعم .. وساعات بيستخبوا وسط المدنيين والطيران مش بيعرف يحدد مكانهم بدقة وسط المدنيين ..

– ليه دايما الارهابيين بينجحوا فى اسقاط الكماين بتاعتنا؟
= مش حقيقى الكلام دة.. كتير جدا بيهجموا على كماين والهجوم بيفشل وبينسحبوا .. بس الاعلام والسوشيال ميديا بيركز بس على الكماين اللى كل افرادها استشهدوا.. ولما تسمع خبر فى الاعلام عن احباط هجوم ارهابى على كمين ومحدش اتصاب بيمر عليك مرور الكرام لا انت بتعلق عليه ولا غيرك بيهرى فيه..

– يعنى انت تقصد ان الوضع مثالى ومفيش سلبيات؟
= لأ طبعا مقصدش كدة، اكيد فى سلبيات طبعا.. بس السلبيات دى يعرفها اللى عايشها بس ، أنت لا تعرف السلبيات ولا عندك حلول ليها واعتقادك ان عندك حل لحاجة انت عمرك ما شوفتها نوع من الهطل .. الضباط اللى فى الكماين اللى حياتهم معرضة للخطر والقادة بتوعهم هما بس اللى عارفين ايه السلبيات وبيناقشوها يوميا وبيفكروا مع بعض ازاى يقدروا يتغلبوا عليها على الاقل عشان خايفين على حياتهم.. انت عايزهم يبعتولك دعوة عشان تحضر اجتماعاتهم وهما بيتناقشوا مثلا؟؟.. لو عايز تتناقش معاهم وحاسس أن رأيك حيفرق اهلا وسهلا اركب ميكروباص للعريش وروح قابل ضباط الكماين واعرف الاول الوضع عامل ازاى وبعدين ابقى اتحفهم برأيك الجهنمى، حيسمعوك والله .. بس صدقنى انت مجرد ما حتشوف شكل الكمين من برة حتعرف انك كنت بتفتى وحتلف وترجع على مكانك..

باختصار .. هى حرب و احنا حننتصر فيها فى النهاية بس مفيش حرب من غير خساير.. سيبك من الهرى ومتشغلش بالك بالرجالة اللى على الجبهة لأن هما عارفين بيعملوا ايه..

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock