صورة بألف معنى
بقلم /جيهان جبر عبد الصمد
عارفين دى صورة مين..
ده رئيس فرنسا الجديد ودى مراته اللى كانت معلمته ..طيب عارفين معنى الصورة دى أيه
أن كل واحد فينا أتولد عشان يعيش حياته بطريقته ..يعيشها زى مايحب يعمل اللى يريحه ..يعنى من حقه يعيش حياته وشغله ويخطط لبكرة من غير ما يعمل حساب الناس ..وارد يغلط ..لاء مش وارد..ده أكيد هيغلط مرة وأتنين بس هيقوم من جديد ومش هيفشل وهينجح بحياته لأنه عايز يعيش ..
الخوف من كلام الناس خلق جوانا مشكلة جوهرية ..مش لازم أحب واحد من عمرى وشكلى وله نفس مستوايا وطبعى ..الأختلاف سنة الحياة ..الصورة قدامك سيدة فى العقد السادس من العمر بين ليلة وضحاها أصبحت حديث العالم وتصدرت المشهد السياسى والأعلامى ..
عيش حياتك زى ماتحب وسيب غيرك يعيش حياته زى مايحب …الخوف من كلام الناس ومن ردة فعلهم القاسية علينا خلق جوانا أزمة كبيرة …لما تخاف تعبر عن حبك ..غضبك..ألمك..فرحك..تبقى فى أزمة ..لما تخاف وتهرب من أنسان حبيته عشان كلام الناس تبقى فى أزمة ..لما تخاف تشكى وجيعتك وتعبر عن ألمك تبقى فى أزمة…
كلمة لاء اللى ساعات كتير بتصرخ جوانا ونخاف نقولها…الدموع اللى ميصحش تنزل قدام الناس وبتفضل محبوسة لحد ما تقتلك ..الأبتسامة الباردة المميتة اللى بنرسمها على وشوشنا عشان منقهرش الناس اللى حبونا…
تعاستى وشقائك..دموعى وجرحك ..هروبى منك وخوفك عليا ..حياتنا اللى أتحولت لجحيم كل ده بسبب واحد بس…هوه أننا سكتنا عن خوف..عن جبن.،عن ضعف …أتكلم ..أصرخ.،قول رأيك ..حارب الكون عشان حبك ..مهما سكت هييجى عليك يوم وتنطق وساعتها الخساير هتكون كبيرة ومش هنقدر نتحملها..
