(اركن على جنب!!!!!) لقد نفذ رصيدكم ارجوا البحث عن مكتب اخر !!!!
كتبت/بسمه عطيه
وفى ليلة هادئة وفى محاولة من محاولتك المتكرره انك تعيش فى سلام وهدوء
وتكون كده قاعد فى حالك لا بيك ولا عليك ماسك كوباية الشاى اللى علية شوية نعناع ومكوع كده على كنبتك ويجيلك تليفون
تبص على النمره تلقى رقم غريب تفكر ثوانى !!!!!!!ارد ماردتش
مبلاش ياعم خليك فى الروقان ما انت زى الفل جنبك علبة فشارك وفى ايديك كوباية شاى والحياه زبادى ب الليمون
وبعد تفكير تاخد القرار الصعب وبصوت حنون تقول الو
يرد عليك شخص صوته غريب لكل حواسك ويقولك الو
عامل ايه يابرنس ايه اخبارك واحشنى مش باين ليه.
انت ترد مين ياعم ؟؟؟
اخص عليك انا فلان الفلانى.ازيك يافلان عامل ايه
ونخش فى مرحلة السلام الشبكية النعكبوتيه الغير منتهيه
وتفضل كده بجى ساعه ونص!!!!!!
فى بالك بقى تقول والله كويس انك ردات لقيت حد يسأل عليك
ونبى فلان ده اصيل ده كبير
وفى لحظة ما عينك هتدمع من فرط اللحظة المثيره الخطيره
وقلبك بيتنطط وكل حاجه فيك بترقص من الفرحه
تسمع الكلمة الخطيرة الكلمة اللى تقفل بلاد وتحطم مشاعر
تسمع الكلمة المدمرة وهى كلمة مختصرة تختصر فيها كل معانى المصلحه تختصر فيها بعض من مركبات الندالة الملخبطه
وتسمع الكلمة المؤسفه(بقولك ايه)
اول ما تسمع الكلمه ده يجيلك صداع فى الوعى الخايب وتحس انك اصيبت بحالة من التهتهة والشلل فى نفس الوقت!!!
ريقك ينشف وعينك بتبظ من مطرحها وايديك بتترعش
كل ما فيك بيدعى ان اللى بالك يكون غلط
يارب يكون بيقول بقولك ايه ماتيجى نتقابل ماتيجى نغير جو ما تيجى يا جدع اعزمك على كوباية شاى بدل اللى تلجت ده
وتحصل الصدمه وتاخد قلم يفوقك ويقول فوق انت فى زمن المصالح
فلان الفلانى اللى بقالك سنه مشفتهوش
عايز منك خدمه اهوربنا زى مابقولك كده !!!!!عايز مصلحه خدمه سبوبه
اهو اطلق عليها اى مصطلح منفعى بحت
اى مصطلح يوريك حقيقة بعض الناس
يختاااااااى على الصدمه!!!!!!!
وانت اللى كنت فاكر نفسك بنى ادم وفى حد فاكرك ومعبرك
طلعت حماده ب الجنزبيل
مش عيب اننا نساعد بعض ونقف جنب بعض ونخدم بعض بس العيب اننا منعرفش بعض الا ساعة الخدمه والمصلحه
صاحبى واخويا اللى معايا على طول وبيسأل عليا وبيكون جنبى وبسمع صوته ان ش الله كل شهر مره ويطلب منى حاجه هعملها وانا فى اسعد حال
انما فلان الفلانى ابن علان العلانى صاحب المصلحة والوجه البائس طول العام والوجه الحنون لحظة الطلب ملوش لازمه
وقلته احسن
والمفروض ان يكون الرد على فلان الفلانى
مشهد تمثيلى
من خيال المؤلف المصدوم
فى نفس الحجرة يجلس صاحبنا العبيط ومعه نفس كوباية الشاى اللى تلجت وجنبة الفشار اللى ماكلهوش عشان الحوار النادم
يعم الهدوء على المكان
يرن جرس الهاتف
يرفع الهاتف الى اذنه ويقول
….. الو مين معايا.
فلان الفلانى
عامل ايه ايه اخبارك واحشنى………….
فلان الفلانى بقولك ايه
صاحبنا اول ما يسمع الكلمه
يقول
مين معايا تيت تيت………..
الخط قطع الو الو ………….
وتعامل صاحب المصلحة ببعض من طرق النداله
عزيزى فلان الفلانى لقد نفذ رصيدكم من حياتنا
كنا لكم اصحاب نعشق خدمتكم ولكن حولتونا الى مكتب من الخدمات السخيفه
وقد قررنا اليوم اغلاق هذ المكتب السخيف
عليك اخى فلان ان تبحث عن بديل ف انت اصبحت على قلبى حجرا ثقيل
وافوتك بعافيه
سيدى فلان الفلانى!!!!!!!!
