قفلت يا واد الباب ومشيت ؟؟؟؟
كتبت عزة الجراح
سلام اليكى يا أم الشهيد من الصعيد
قفلت يا واد الباب ومشيت ؟
طب يا وليدى كنت شويه استنيت
كنت عاجيب لك يابنى خزين للبيت
شويه سمن على باكوين شاى وجزازة زيت
فرحك باجى له شهر على ما تكون جيت
اكون كمانى شريت لك البراجع ودهنت الحيط
مستعجل ليه؟؟
وتجولى يا يمه الديش باعيد موش جنب الغيط
وهو انى جاهله ؟؟
مانى عارفه ديشك ف الصحرا
طب يا وليدى كنت شويه استنيت
قفلت الباب يا واد ومشيت ؟؟
ولجل ما تتجوز يا وليدى انا بعت الارض
تغلى عليك ؟؟
مانت هناكى بتحمي لنا الطول والعرض
ولا كنت عاوزنى اتداين واخد لك قرض ؟
اتصدج ؟؟ لما جولت بديش اتجوز انى اتغميت
موش حابب يكون لك عروسه وعيالك تعمل لك صيت؟؟
والله اتغميت
قفلت ياواد الباب ومشيت
طب ياوليدى شويه كنت استنيت
لبيوت اخوالك واعمامك انا روحت وجيت
والكل لفرحك من جيبلى .. بالفرد دعيت
وقعدت اصلى وانا باسجد من قلبى دعيت
ونمت ياقلبى على صورتك وشويه صحيت
شايفاك جاى باعييييييد بتجولى يايمه انا اتحنيت
وف يدك الحنه وبتضحك ..
بتجول لى يا يمه انا اتزفيت
لعروسه حوريه من الجنه
وبجا ليا جصر وبيت
تعرف يا ووليدى .؟
م الفرحه طلعت منى
زغروووده طوييييله من قلبى .. بعديها بكيت
قفلت يا واد الباب ومشيت ؟؟
طب يا وليدى شويه كنت استنيت
