على قيد الحياة
بقلم/ جيهان جبر
“مازلت على قيد الحياة ” انت عارف معناها ..عارف قيمتها ولا لازم تفقد انسان عزيز على قلبك عشان تعرف قيمة أنك لسه عايش ..الحياة مش وحشة أوى زى ما أنت متخيل ومش بتمنحك فرصة واحدة لن تتكرر بالعكس مع كل طلعة شمس قدامك فرصة جديدة وعمر جديد
أوعى تتردد لحظة أنك تتمسك بحقك فيها ..أوعى ترفع الراية البيضا وتستلم مهما بلغت أخفاقاتك عنان السماء..حاول تقلب الصفحة اللى فيها بعض النقاط السوداء وافتح صفحة جديدة ونضيفة وأرمى كل شىء ورا ضهرك وروح مكان بعيد محدش يعرفك فيه وأحفر حفرة كبيرة أوى وأرمى فيها كل عيوبك.. ذنوبك..نزواتك..هفواتك ..ارمى فيها أى حد أتسبب لك بلحظة ألم وادفنه بالحفرة مهما كان غالى مش هيكون أعز عليك من نفسك..وكمل طريقك وأوعى تبص وراك وانساهم وأنسى مكان الحفرة .
ابدأ حياة جديدة مع ناس جديدة ولا بأس أن ترتكب أخطاء جديدة وأفرح أنك لازلت على قيد الحياة..وبشوية حاجات بسيطة أوى ممكن تخلى حياتك ألطف واروع يعنى خليك فى حالك ومالكش دعوة بغيرك متدخلش حياة حد وتخربها والاهم اياك وكسر الخواطر لآنه حرام صدقونى كسر الخواطر بيوجعنا أوى .
انت لو بتقرا كلامى ده يبقى انت لسه عايش ولازلت على قيد الحياة بسرعة قوم أتوضى وصلى وأرمى ذنوبك على رب العالمين واستغفر ربك وخلى جبينك بالآرض وذل نفسك قدام ربنا وأرمى اى ذنب عملته مهما عظم .أوعى تنسى لحظة أن ربنا يبسط يده بالليل ليتوب مسىء النهار ويبسط يده بالنهار ليتوب مسىء الليل ..ياللا بسرعة أنتهز فرصة أنك لازلت على قيد الحياة
