مصر السيسي اد الدنيا

كتبت عزة الجراح

كل الإجراءات والقرارات وكل المشروعات اللي الرئيس السيسي عملها من فترة وإتهاجم عليها من أعدائه وقتها ظهرت قيمتها دلوقتي وظهر معاها إن تفكيره ورؤيته للمستقبل كانوا سابقين كل اللي بينتقدوه بمراحل وبعدد كبير من السنين ،

• النهاردة مثلاً ظهرت فايدة تطوير التعليم ونظام التابلت مع تأدية طلاب أولي ثانوي الإمتحان بدون أي مشاكل وبدون تعرض حياتهم للخطر اللي كان وارد يحصل بسبب فيروس كورونا لو كان الإمتحان تم بالنظام القديم وسط التجمعات ، أو المقابل كانت هتضيع عليهم السنه لو مكانش نظام الإمتحان بالتابلت تم تطبيقه ،
والفضل النهاردة في النجاح ده مش بس لطارق شوقي وزير التعليم، الفضل الأكبر للرئيس اللي قام بالتمسك بطارق شوقي وتبني خطته في تطوير نظام التعليم ومخضعش لأي إبتزاز أو ضغوطات أو هشتاجات تطالب بإقالة وزير التعليم .

• نفس الكلام في تمسكه بدكتورة هاله زايد وزيرة الصحة برغم المطالبات الغير مبرره من فترة بإقالتها اللي الرئيس ملتفتش لها ،ومع الوقت ظهر إنها قد المسئولية وقامت بإدارة الأزمة بمنتهي الإحترافية عن طريق برامج زي برنامج الرصد والتتبع ،ويكفي شهادة منظمة الصحة العالمية اللي أشادت بإجراءات وزارة الصحة في مواجهة فيروس كورونا .

• صفقات تسليح الجيش اللي الرئيس إتهاجم بسببها كتير ومع الوقت ظهرت قيمتها في حماية حقول الغاز في المتوسط ومع الأزمة في ليبيا .

• المشروعات القومية اللي كان بيتقال أيه لازمتها!! واللي من ضمنها مشروعات الصوبات الزراعيه ومزارع الإستزارع السمكي والمليون ونص فدان اللي النهاردة ظهرت أهميتهم خصوصاً مع أزمة كورونا عن طريق إن كل السلع متوفرة عندك ومفيش أي أزمات وكمان بنقوم بالتصدير في الوقت اللي دول كتير إقليمية وغربيه عندها أزمه في السلع والمنتجات الزراعية إتكلمت عنها “فاينانشيال تايمز” وقالت ان العالم على شفا أزمة غذاء بسبب فيروس كورونا .

• إجراءات الإصلاح الإقتصادي اللي تعتبر اكتر حاجة الرئيس إتعرض لإنتقادات بسببها لما قام بيها في 2017 النهاردة برضه ظهرت جدواها وأهميتها لان بدون الإجراءات دي مكانش إقتصاد الدولة هيسمح إنها تاخد إجراءات وقرارات زي اللي أخدتها للتخفيف عن المواطنين في ظل أزمة كورونا .

• محطات الكهرباء اللي كان بيتقال أيه لازمتها وهي فشخرة وخلاص علشان نعمل أكبر محطات في العالم !!
النهاردة ظهرت أهميتها خصوصاً لما تسمع التقارير العالمية اللي بتتكلم علي إن العالم هيعاني قريباً من أزمة في الطاقة وفي نفس التوقيت تلاقي بلدك عندها فائض من الكهرباء بتقوم بتصديره وبتعمل شبكات ربط مع الدول المجاورة .

•• حاجات كتير من دي لما الرئيس عملها وقتها كان بيفقد قصادها جزء من شعبيته ومكانش وقتها بيلتفت لشعبيته وكأنه كأن بيقول من جواه “بكرة يعرفوا” ،، وفعلاً دلوقتي لما لفت الأيام والناس شافت بعينيها نتيجة الإجراءات والمشروعات دي وعرفت إن الراجل ده كان تفكيره صح شعبيته إتردت له أضعاف مضاعفة .