يامصريين ارجوكم اسمعونى بقلم/ جيهان جبر
طول عمرنا نسمع ان مصر ام الدنيا..كتير ميعرفش معناها بس اهى كلمة بتعجبنا وخلاص..بس الحقيقة ان كل المؤرخين على مدى الاف السنين اكدوا ان مصر ام الدنيا…تعالوا نعرف ليه
لما جه الطوفان سيدنا نوح ركب المركب مع حفيده مصرائيم وطبعا من كل زوجين اثنين..وكان كل ما يعدى على بلد الملايكة تخرج تستقبله وتحرسه .لغاية ما وصل لبلدك مصر..محدش من الملايكة خرج يحرسه ..غضب سيدنا نوح..نزل عليه الوحى سيدنا جبريل قاله يانوح انا جعلت فى كل بلد ملايكة تحرسها الا مصر فانا توليت حراستها بنفسى …الله اكبر.عليكى يابلدى..فرح سيدنا نوح لانه كان هربان من الطوفان وفرح حفيده مصرائيم وقاله ياجدى انا امنت بك ولم يؤمن بك ابى ..فانا استقر هنا..واسميها مصر ..فادعى لى دعوة علنى اسعد بها..قال نبى الله نوح .” اللهم انه امن بى فاسكنه الارض المباركة التى هى ام البلاد وغوث العباد” شايف يامصرى ربنا كرمنا ازاى..اوعى تخلى حد يكسر ارادتك ..انت فقير ..اه ممكن .. بس انت مصرى ..بيعايرونا بفرقنا وبشوية رز وقمح..بس ولا يهمك اصرخ باعلى صوتك قول انا مصرى..انا ابن الفراعنة اللى قدموا للتاريخ اعظم الحضارات.ويكفينا فخرا وعزا ان سيدنا ابراهيم ابو الانبياء تزوج من نسائنا وانجب منا اسماعيل ابو العرب.ويكفينا شرفا وزهوا ان سيد الخلق سيدنا محمد عليه الصلاة والسلام تزوج من نسائنا وانجب ابراهيم..والتى احصنت فرجها جاءت الينا ومعها المسيح عيسى بن مريم لتحمى وليدها …يكفينا ان سيدنا موسى كان وليدا على ضفافها وعاش بين ربوعها..هى ارض الانبياء بلافخر …
انا كده خلصت الكلمتين بتوعى..من فضلكم حافظوا ع البلد اللى ربنا بنفسه حاميها..خاف على مصر .احنا اكتر من تسعين مليون .هنروح فين .ونرسى على اى مينا .خلينا نعتصم بحبل الله .ونقول يارب عدى الايام دى على خير
