طوبى لمن بكى خطيئته
بقلم/جيهان جبر عبد الصمد
تعرفوا إن أحلى شىء بالدنيا هو الأمل …وده مش بيجى بالساهل ولا من فراغ ده محتاج قوة إيمانية عميقة وحسن الظن بالله..أنت كل يوم بتقابل ناس بيخلوك تندم أنك عرفتهم ..بتقابل وشوش غريبة مدسوسة بين البشر ..وشوش شبه الوحوش مبترحمش ..وشوش تكدب وتغش وتخدع وتخون …وإنت واقف بتتفرج ولسه واقف على رجلك لاوقعت ولا أنهارت ولابكيت بتبتسم إبتسامة تقطع القلب ..وماشى فى طريقك ومكمل معاهم عارف ليه ؟…لأنك حد طيب عايز يعيش فى أمان الله ..لأنك بتعافر عشان تعيش ومعاك حق الحياة مهما كانت صعبة لكن ساعات بتبقى حلوة وتستحق أننا نعافر عشانها ..
رغبتك فى الحياة وإيمانك بالله هتنفتح قدامك كل السكك المقفولة ..بس إنت خليك واثق فى الله وواثق أنك مهما قاسيت وشقيت وبكيت ربنا مش ممكن ينسى قسمتك ونصيبك من الفرح .،
كل ماقلبك يتملى من الوجع إجرى على ربنا متخافش هو هيسمعك وهيحس بيك هو ألطف من أنه يقسى على عباده ..إشكى لربنا من غدر الصحاب وظلم أقرب الناس ليك محدش غيره هيسمعك ولاهيحس بيك..
وأنت كمان خليك حنين على نفسك أقف قدام المرايه مرة واحدة فى حياتك وشوف نفسك على حقيقتها وطيب خاطرها وقولها سامحينى لأنى جيت عليكى كتير لأنى حسيت بغيرى وأنتى لاء…حبيت غيرى وأنتى لاء..حنيت على غيرى وقسيت عليكى …إمسح دموعك بأيديك طبطب على نفسك وأحضنها مهما كان وجعك وألمك أرفع أيديك للسما وقول يارب هو أحن من الوالدة على ولادها ..قوله يارب بس من قلبك هيقوللك لبيك عبدى..لبيك عبدى ..أطلب ماشئت إن لك رب كريم..
