“منى البرنس” رسوم توقيع الكشف الطبى لمرشحى الرئاسة 6 الاف جنية

متابعة/ فتحى طنطاوى

قالت الاستاذة  الجامعية “منى البرنس ” على صفحتها فى مواقع التواصل الاجتماعى فيس بوك رحت الصبح قسم حدائق القبة لاستخراج فيش و تشبيه. قدمت الورق، المفروض استلمه يوم الأحد. المأمور أخذ بياناتي و سبب طلب الفيش و قعدني في مكتبه و طلب لي قهوة و قعد يعمل اتصالات، بعدين خرجت من مكتبه و قلت له شكرا علي القهوة لازم اكمل اجراءاتي.
حسب كلام المستشار اللي قابلته في الهيئة الوطنية للانتخابات، اروح اعمل كشف طبي في المجالس الطبية المتخصصة، حسب كلامه خلف وزارة الاستثمار اللي في صلاح سالم. رحت مبني مكتوب عليه هيئة تدريب الأطباء، الامن أخذ بطاقتي، و بعد شوية جاني عقيد قال لي اهلا و سهلا بس المجالس الطبية في مدينة نصر الحي الساذس، و وصف لي اروح ازاي. رحت مجاهل الحي السادس لحد ما وصلت للمبني المذكور. أخذني احد العاملين لمكتب، و هناك قابلت شخص اداري، قال لي المطلوب، ٦٠٠٠ جنيه، و ٦ صور، و صورة البطاقة الشخصية. قلت له بس مش مكتوب علي موقع الهيئة الوطنية اني لازم ادفع ٦٠٠٠ جنيه. قال لي لأ هو دة النظام..
فأدفع ال ٦٠٠٠ جنيه و أقدم طلب لتوقيع الكشف الطبي و اللجنة توافق و بعدين اروح بجواب لمستشفى من ال ٣ دول، معهد ناصر، المكز الطبي العالمي، او مستشفي الشيخ زايد في ٦ اكتوبر لاجراء التحاليل و الفحوصات و الاشعة، اللي معرفش نتايجها هتطلع امتي بالظبط، المفروض ٤٨ ساعة. و المجلس النتخصصة دي هتخلص شغلها يوم السبت، يعني معايا بكرة و الجمعة، رغم ان اخر موعد للتقدم رسميا للترشح يوم الاثنين ٢٩ يناير.
تمام، بس كان المفروض المعلومات دي تتوضح علي موقع الهيئة الوطنية للانتخابات.
و مافيش مشكلة ادفع الفلوس، الخوف بس ابقي سليمة و بعدين اخرج عيانة.