حقوقك وواجباتك فى الشارع

بقلم / أبانوب جرجس المحامي

– هتعمل ايه لو حد من الشرطه وقفك ف الشارع و سألك على بطاقتك ؟
الاول لازم تعرف مين هو مش يمكن يكون حرامى و بيثبتك
– طب ازاى ؟
قوله بكل ذوق تحت امرك بس ممكن اعرف مين حضرتك
– هيقولك مش من حقك ؟
قوله لا من حقى انى اعرف مين بيكلمنى زى ما انت خدت الحق لنفسك انك عاوز تعرف انا مين
– ملحوظه : القانون الزم الجهه الشرطيه انهم يعرفوا الناس بشخصهم و ده ف الماده 24 مكرر من قانون الاجراءات الجنائية
– طب ايه شكل الكارنيه ده ؟
هتلاقى اول حاجه مكتوبه الرتبه بعد كده الاسم بعد كده تاريخ الاصدار بعد كده رقم البطاقه وبعد كده فصيله الدم .
– طب لو الظابط لابس ميرى ؟
برضو من حقق تشوف كارنيهه وتتعرف على شخصيته , يا جدع ممكن يكون ممثل لابس ميرى وبيمثل عليك دور او حرامى وسارق اللبس وبيعمل عليك نمره
– ولو ممعيش بطاقه ؟
متخافش دى مخالفه عدم حمل بطاقه تحقيق شخصيه عقوبتها الغرامه مش جريمه يعنى ولا هتتحبس فيها ولا حاجه ولا من حقه يقبض عليك ولا يفتشك كمان ولو عمل اى اجراء من دول يبقى باطل
– طب لو اخد البطاقه ومرجعهاش ؟
من حقك تروح تعمله محضر ف القسم انه اخذ بطاقتك من غير سبب وتشتكيه لمأمور القسم كمان
– طب ممكن حاجه تثبت الشخصيه بدل البطاقه ؟
اه طبعا ممكن جواز السفر او الرخصه لانهم صادرين من وزاره الداخليه انما شهاده الميلاد متنفعش لانها غير صادره من وزاره الداخليه , بس لو معاك شهاده الميلاد بيكون فيها الرقم القومى ممكن لو الظابط شاكك فيك اوى يكشف عليك على الكومبيوتر بالرقم القومى او اسمك علشان يتأكد انه مش عليك اى قضايا .
– طب لو بطاقتى اصلا ضايعه او مسروقه ؟
يا سيدى روح الاول اعمل محضر ف القسم اللى ضاعت ناحيته بفقد البطاقه علشان تأمن نفسك وبعد كده روح اعمل بدل فاقد من السجل المدنى
– طب لو عملت بطاقه جديده ولقيت بطاقتى القديمه ايه اللى يحصل ؟
اللى يستعمل بطاقتين ف وقت واحد يتحبس مده لا تزيد عن سنه أو بغرامه لا تزيد عن 500 جنيه
– ولو حد لقى بطاقتى واستعملها فى عمل غير مشروع ؟
لو عملت فيه محضر هيتحبس مده لا تقل عن سنه
– ولو انا بره مصر وعاوز اعمل بطاقه او اغيرها او بدل فاقد؟
تقدر تروح تطلعها من القنصليه المصرية اللى ف البلد اللى انت مسافر فيها