بقلم : جيهان جبر
ساعات كتير بنقول الدنيا دى غريبة أوى..طيب ليه غريبة ؟ عشان بتعاكسك شوية بس ده عادى بتحصل كتير.. طيب عشان حرمتك من حبيب اورفيق طريق برضه عادى ..بس على فكرة الدنيا كده تبقى موش غريبة أنت اللى غريب أنت اللى نفسك قصير ومتقدرش تعافر معاها.الدنيا دى عايزة القوى موش الضعيف .اللى يحارب عشان حلمه موش اللى يدفن حلمه بين ضلوعه .دنيتنا دى موش عايزة بياعين الكلام والهوى فكلاهما كنافخ الكير ان لم يحرقك أغضبك وأحزنك.
حاول تتصالح مع الدنيا موش هتخسر اكتر من اللى خسرته . حاول تتعايش مع قلبها القاسى . حاول تحب جنونها وقسوتها ممكن تفشل مرة واتنين وتلاتة عادى جدا وممكن تقع أكتر من مرة . حاول تثبت لكل اللى حواليك أنك نبته صالحة .أوعى تيجى ع المظلوم واللى مالوش ضهر يحميه .مفيش داعى تتجبر وتتفرعن على خلق الله . معيش داعى تخرب وتكدب وتحرق علاقات بكلمة أو نسخ رسالة تدمر بيها كل المشاعر الحلوة بين الصحاب مفيش داعى تقهر وتظلم لانك مش قد دعوة المظلوم كفاية أنه لما يرفع أيده للسما ويقول أنى مغلوب فأنتصر هيبقى وشه أبيض زى الفل وعينه مش مكسورة . ساعتها هيرد عليه ربنا ويقوله وعزتى وجلالى لانصرنك ولو بعد حين
0 230 دقيقة واحدة