السمان يكتب صدق أو لا تصدق .. !

 

في بلدنا للأسف تلاقي البعض عاملين إئتلاف محتاج إئتلاف ومفيش فيهم 5 متفقين علي خطة عمل مفيدة ، أو وجهة نظر ،
أو خطة مستقبلية لخدمة هذا الوطن العريق والمواطن المصري .

هتلاقي حضرتك كمان حزب المفترض أنه محتاج كوادر تقيله دارسه وفاهمه يعني إيه عمل سياسي وحزبي ، علشان يبقي حزب ، و لكن متلاقيش ومفيش وكله للشو والمصالح الشخصية فقط إلا من رحم ربي .

تلاقي كل جماعة عاملين (إتلاف) في البلد يقدموا نفسهم إنهم ( إئتلاف ) أو حزب أو كيان أو حلف .. إلخ ..

معتقدين إنهم ضحكوا علي الناس اللي بتفهم وصدقوهم وحتي ده فشلوا فيه ، العجيب والغريب يا حضرة المواطن إنهم يعلنوا لك إنهم ائتلاف أو حزب أو تحالف وتلاقيهم مكملوش١٠٠ نفر ميعرفوش أي حلول فعلية لمشاكل الوطن والمواطن .. إلا القليل منهم.

تيجي تسأل أي حد منهم إيه الفرق بين الإستجواب وسحب الثقة وطلب الإحاطة متلاقيش ، أو الأدوات والقوانين المنظمة للعمل التطوعي او المؤسسي ما يعرفوش ، أو ما الفرق بين النظام الجمهوري والبرلماني يقولك متسألنيش وغيره كتير .

طيب هتعملوا إيه للناس فعلياً، طيب خطة عملكم المستقبلية للوطن الغالي والمواطن ، طيب أنتم مين وتمويلكم إيه ..

كل دي أسئلة تطرحها للأسف متلاقيش إجابات شافية وافية ، وكلها تقريباً كيانات خزعبلية كرتونية ومحاولات ضحك على الشعب الأصيل العريق اللي فاهم كل شئ .. لابد من لوائح صارمة منظمة لأي كيانات ومدي جديتها ..

أخيراً …
احترموا الوطن والمواطن ،
و إستقيموا يهديكم الله .

بقلم / عبد الرحيم السمان
كاتب ومراسل قناة صدى البلد وبرنامج أمن وأمان