عبد الناصر حكاية شعب بقلم أميرة عمر
من النقاط اللي بتستوقفني .. اللي بيقولوا ان ناصر كان ديكتاتور .. و بيكون عندهم اسبابهم .. بس في حاجة بتدهشني جدا في الرأي ده ..
الاول ان الديكتاتورية بتسعى لترسيخ الجهل و القبح للعمل على مسخ الشعوب .. و ده لضمان خضوعهم التام ليه .. و التاني ان الديكتاتور دايما بيكون جبان و خايف و دايما يستخبى و يتوارى عن الناس .. دول مفيش عليهم جدل ..
بالنسبة للقاعدة الأولى .. هل عدد المدارس اللي تضاعف 5 مرات في عهد عبد الناصر و إقرار المجانية بشكل كامل .. و تخصيص اكبر نسبة في ميزانية الدولة للبحث العلمي و الصحة .. و إنشاء دور سينما و مسارح و أندية ثقافية في الصعيد تحديدا بيصب في خانة التجهيل و التقبيح اللي بيسعى ليها اي ديكتاتور ؟ ..
و القاعدة التانية .. موش هاتكلم عن العربية المكشوفة و المواكب .. ولا عن إن الدولة في عهده انتجت افلام زي اولاد حارتنا و السمان و الخريف و شيء من الخوف اللي بينقدوا النظام و بيجلدوه بشكل صريح و بدون مواربة .. انا هاتكلم عن الاخطر من كده .. هل في ديكتاتور بيسلم للشعب اسلحة ؟ .. لما ناصر يدي للفدائيين اسلحة للمشاركة في الحرب جنب صفوف الجيش .. و لو هو ديكتاتور و كان مكروه و الناس بتحب الملك و نجيب و الاخوان .. مخافش ان الناس تتخلص منه او على اقصى تقدير يعلنوا تمرد مسلح بعد الحرب ؟ .. هل في ديكتاتور هيسلم سلاح للشعب و الشعب بعدها يرجع الأسلحة تاني ؟ ..
اكيد في ناس عندها اسبابها في عدم حب ناصر و وصمه بصفة الديكتاتورية .. بس مع احترامي الشعب و الواقع بيردوا عليكم .. و انكان لكم وجهة نظر .. فلينا تاريخ و واقع و نضال شعب
