“ابكى ليه” كلمات الشاعر على مدكور
لما كنت بجد ليا
كان يهون الكون ف لمسه من ايديك
واما غبت كتير عليا
هنت واللى باع ياقلبى يهون عليك
واللى مايفكر ياخدنى
كحل يرسم بيه عنيه
اخده ليه كحل لعنيا
والا ابكى ليه عليه ؟
قلبى كان مليان سماح
لما كنت من الملاح
كنت بير مليان محبه
واتردم مبقاش براح
كنت بارضى الميه منك
لما ف الغربال تجيبها
وارتوى وافرح كأنى
خدت م الانهار نصيبها
لما كنت اشوف متاعبك
كنت اسهرلك بدمع العين اداوى
واما طاب م الهم قلبك
ليه بتتنكر لافضال المداوى
عيش ياقلبى للهوى وغرد نشيده
واللى يريدك بالوفا والحب ريده
وان طلب بعدك اوام م البعد زيده
استحاله
ينفع الترقيع ف توب دايب هوان
اصله لا احسان ولا طيبة لسان
يابدين بالكره ياللى مالك امان
ارتحل عنى مالكش خلاص مكان