.قمة العجب ..
كتبت عزة الجراح
لما تعرف انه كان شغال خبير تعليم في اليونسكو وعالم رياضيات وميكانيكا وعميد كلية العلوم والهندسة بالجامعة الامريكية ووضع برامج تطوير للتدريس والاتصال على مستوى عالمي وحاصل على جوائز من جوة ومن برة.
ولما ييجي يحط برنامج لتطوير التعليم في مصر نحوله بجبروتنا لراجل مش عارف هو بيعمل ايه وجاي يجرب في ولادنا بقرار طق في دماغه فجأة وكأنه بياع بطاطا ضل طريقه لوزارة التعليم..
ولا كأنه كان خبير دولي وأستاذ جامعي ومسئول عن المجالس القومية المتخصصة ومنها مجلس التعليم..
ولا كأنه كان مسئول عن تجربة العالم أشاد بيها اسمها بنك المعرفة وبقاله ٤ سنين بيدرس ويمحص في مسألة التعليم والوحيد اللي قعد شاومينج جنب امه يخرط بصل بعد تسرب الامتحانات ما بقى عيد قومي بيحتفلوا بيه كل ثانوية عامة.. وكمان طلع بيضر بالعلم والتعليم ومستقبل عيال كي جي وابتدائي المهني في سوق العمل اللي هايدخلوه بعد ١٨ سنة!!
لا ونقعد نعيط على التجربة الماليزية والهندية والاقحوانية!
ده انا من كتر الهري والهلع اللي عند الناس فكرته ساقط اعدادية.. لقيته ماشاء الله معدي الاعدادية بكتير!
احنا مش محتاجين تطوير تعليم.. احنا محتاجين قبلها لعلاج نفسي وعصبي ومعوي كمان علشان بقى عندنا تسمم مزمن!
