الفتاة المتمرده الحلقة الرابعة بقلم/منى احمد الطاهر

تعود الحياة لطبيعتها وتمر الأعوام وتتدرج إلهام في السنوات الدراسية إلي أن تصل للصف السادس الإبتدائي وتنجح فيه بدرجات عالية وتعود مسرعة إلي والديها لتزف لهم خبر نجاحها
إلهام : بابا ماما أنا نجحت وطلعت التالته علي المدرسة
فكرية : ألف مبروووك ياحبيبتي شطورة من يومك
إبراهيم : مبروك يا إلهام خلاص كدا
تقاطعة فكرية : إسكت بقي سيب البت تفرح شوية
إبراهيم : ماشي بس إللي قولتلك عليه هو إللي هيحصل
إجتمعت إلهام مع أصدقاء طفولتها ( ملك و شادي وآية) وجلسوا يتحدثون كيف يقضوا أجازتهم الصيفية هذا العام
آيه : شوفوا إنتوا ناويين علي إيه بس ياريت مطولوش عشان إحنا كلها إسبوعين وهنعزل من الحته
إلهام : تعزلوا علي فين؟ ومدرستك ؟
آيه : بابا بيقول خد لنا شقه في مكان أحسن من هنا وكانوا مستنيين نخلص إمتحانات أنا وأخواتي وهنحول بقي في المدارس إللي هناك
شادي : بس هيبقي صعب تتعرفي علي أصحاب جديده وكل حاجة في حياتكم هتتغير
آيه : هنعمل إيه بقي مع الوقت هنتعود وأنا أكيد هاجي كل فترة أشوفكم وإنتوا كمان تجولي
إلهام : قلبك أبيض دا أنا بشوفكم هنا من ورا بابا بالعافية عايزاني كمان أروح في حته أبعد من هنا من غير ما يعرف
ملك : إحنا أكيد هنجيلك يا آيه مهما رحتي فين إحنا وراكي
شادي : طب ها هتعملوا إيه بقي في الإسبوعين دول
إلهام : أنا بفكر ندور علي مركز كويس وناخد كورس إنجليزي
ملك : يا باي عليكي إنتي مفيش حاجه في دماغك غير المذاكره والكتب
شادي : طب والله فكرة حلوة
ملك : دا إحنا مصدقنا خدنا الإجازة يا جدعان
آيه : قولتوا لأبهاتكم الأول ولا بتتكلموا كدا وخلاص
ملك : أيوه أهي بقي إللي إخترعت الفكرة دي أول واحدة باباها هيرفض
إلهام : لأ متقلاقوش أنا هزق ماما عليه زي كل مرة وهيوافق بإذن الله
شادي : تمام وأنا بقي هقولكم هناخد الكورس فين لما أشوفكم المرة الجاية
ويفترق الأصحاب كلا علي منزله ليخبر أهله بما إتفقوا عليه
إلهام : ماما حبيبتي يا غاليه
فكرية : أكيد عايزه حاجه هاتي من الآخر وقولي عايزه إيه
إلهام : بصي بقي ركزي معايا وإفهميني عشان تفهمي بابا وتخليه يوافق لازم يوافق
فكرية : يوافق علي إيه يا بنتي
إلهام : أنا وصحابي عايزين ناخد كورس إنجليزي عشان نتقوو كدا وتبقي لغتنا تمام وتسهل علينا المذاكرة في المدرسة
فكرية : لأ فكك من الحوارات دي وبلاش نتكلم فيها أحسن
إلهام : ليه بس يا وليه بتقفليها في وشي كدا
فكريه : أنا عارفه باباكي بيفكر في إيه عشان كدا بقولك بلاش
إلهام : ليه يعني عشان الفلوس أنا مش هاخد منه ولا مليم أنا محوشه تمن الكورس من مصروفي
فكرية : لأ مش عشان الفلوس
إلهام : أومال إيه بقي قوليلي
فكرية : أسكتي دلوقتي وخلي كل حاجة لوقتها
إلهام : لأ بقي أنا لازم أعرف دلوقتي في إيه يا ماما
فكرية : باباكي مش هيوديكي مدرسة تاني وبيقول كفاية عليكي كدا
إلهام : لأ إنتوا أكيد بتهزروا
فكريه : والله زي ما بقولك كدا
إلهام : إزاي يعني كفاية عليا كدا هو أنا لحقت دا يا دوب خدت الإبتدائية
فكرية : باباكي بيقول البت مهما إتعلمت مصيرها في الآخر لبيتها و ولادها
إلهام : بيت مين و ولاد مين أنا فين والكلام ده فين
فكرية : حبيبتي إنتي مش بتعرفي تقري وتكتبي و ده المهم مش لازم الشهادات
إلهام : إنتي كمان هتعومي علي عومه يا ماما إنتوا إتفقتوا عليا ولا إيه
فكرية : ولا إتفقنا عليكي ولا حاجة متكبريش الموضوع وسيبي الكلام لوقته
إلهام : بقي كدا ماشي يا ماما
فكرية : متجبيش سيرة لباباكي لحد ما أتكلم معاه تاني وأشوف آخر كلامه إيه
إلهام : وماله خدي فرصتك معاه للآخر عشان بعد كدا محدش يلومني
فكرية : ههههههه يلومك علي إيه بطلي هبل
إلهام : ماشي يا ماما هأجل الهبل ده شوية
تنتظر إلهام بغرفتها خروج والدها إلي عملة وفور خروجه تسرع إلي والدتها
إلهام : ماما أنا نازله عايزه حاجه
فكرية : إستني إنتي كل يوم كدا تنزلي وتسيبيني لايصه في البيت
إلهام : حاضر يا ماما لما أكبر شوية هساعدك وهريحك ع الآخر
فكرية : تكبري إيه دا أنا في سنك كنت بعمل شغل البيت كله
إلهام : يا ماما أيامكم غير أيامنا أنا كل شوية هقولك الكلمتين دول
فكرية : طب روحي ومتتأخريش أحسن باباكي يجي يطين عيشتنا
إلهام : حاضر سلام يا جميل إنت
وتذهب إلهام إلي أصدقائها ويدور بينهم الحديث التالي
آيه : أهي شرفت الست إلهام ها عملتي إيه مع باباكي
إلهام : عملت إيه في إيه
ملك : في موضوع الكورس إنتي نسيتي ولا إيه
إلهام : آه لأ منستش ولا ولا حاجه شوفوا هتروحوا فين وإمتي وأنا معاكم
شادي : أنا عرفت مركز هنا في الحته وهناخد الكورس فترة صباحية عشان باباكي ميعترضش لو كان بالليل
إلهام : فترة صباحية طب تمام دا كدا حلو أوي
شادي : خلاص هروح أتفق معاه ونبتدي من بكرا
آيه : إتفقنا وقولنا مصاريفه كام عشان نقول لأبهاتنا
وفي اليوم التالي المقرر فيه أول حصة في الكورس تخرج إلهام بعد أبيها ولكن في هذه المرة تكذب علي والدتها ولم تخبرها بأنها ذاهبة لتحضر كورس الإنجليزي مع أصدقائها ومرت الأيام وتكررت نفس الفعله وإعتادت إلهام الكذب علي والديها ولم يتبقي علي إنتهاء الكورس سوي حصتين وحدث ما لم تكن إلهام أن تتوقعه ولم تضعه في الحسبان حين كذبت علي والديها ففي الحصه القبل الأخيرة وفي أثناء خروج إلهام من باب المركز وهي تضحك مع أصدقائها توقفت فجأة وتسمرت قدماها حين رأت والدها أمامها عند مرورة من أمام المركز فلقد شعر الأب ببعض التعب وإستأذن في الإنصراف من عمله وعاد إلي منزله قبل موعده المحدد بساعتين
و وقفت إلهام وهي تنظر لوالدها وهي فاقدة القدرة علي النطق
الأب : بت يا إلهام إيه إللي جابك هنا وبتعملي إيه
وينظر الأصدقاء لبعضهم وهم في دهشه مما يرون
ثم تبتسم آيه إبتسامة تشفي وتنظر إلى إلهام وتقول
آيه : هو إنتي يا إلهام مقولتيش لأبوكي إنك بتاخدي معانا كورس إنجليزي
شادي : وهو ينظر ل آية نظرة غضب أسكتي إنتي ملكيش دعوة
ويصفع الأب إلهام علي وجهها ويركلها لتطرح أرضاً ويصرخ الصغار ويستنجدون بالمارة لينقذوا صديقتهم بينما يقف شادي أمام والد إلهام ويقذفه بالشتائم ويحاول أن يتلقي الضربات عن إلهام وينجح الأطفال في أن يخلصوا إلهام من يد والدها وتجري مسرعة إلي منزلها وتدخل غرفتها وتقفل بابها من الداخل ويأتي الأب بقفل ويقفل عليها الباب من الخارج
إبراهيم : تمام كدا مكانك وصلتيه … فكرية إنتي يا فكرية
فكرية : أيوه حاضر في إيه
الأب : تعالي دا أنتي وقعتك سوده
نالت فكرية ما نالتة من زوجها علي فعلتها الشنعاء في حقة حين خالفته في الرأي وسمحت لإبنته بأن تخرج من المنزل لترفه عن نفسها مع أقرانها دون علم أبيها ولم تحزن فكرية علي حالها بقدر ما حزنت علي المصير الذي وصلت له إبنتها بعد أن قام والدها بحبسها داخل غرفتها وأقفل بابها بقفل لم يكن له مفتاح سوي معه فقط فهو من يفتح الباب بين الحين والآخر ليدخل لها الطعام أو ليقودها إلي الحمام ويرجعها لغرفتها مرة أخرى ويعود بقفله
وكيف أنها تتعذب لحال إبنتها وهي تستعطفها بأن تكسر باب الغرفة في ساعات الصباح في غياب الأب
ولم تستطع فكرية فعل شئ لإبنتها خوفاً من رد فعل الأب وجاء أصدقاء إلهام ليطمئنوا عليها ويعطوها شهادة الكورس فتحت فكريه لهم الباب
شادي : إزاي حضرتك يا تنت ممكن نشوف إلهام
فكرية : لأ مش ممكن
ملك : أرجوكي يا تنت عشان خاطري إحنا خلاص هنعزل وعايزه أسلم عليها قبل ما أمشي
فكرية : معلش أنا هبقي أقولها إنكم سألتوا عليها
وتنادي إلهام علي والدتها من داخل غرفتها بعد سماعها لحديثها مع أصدقائها
إلهام : ماما يا ماما معلش خليهم يدخلوا
فكرية : وهيدخلوا إزاي ما إنتي عارفه
إلهام : دخليهم لحد الباب وأنا هكلمهم من ورا الباب
فكرية : بس بسرعة إحنا مش ناقصين وكفاية إللي حصل
يله إدخلوا بسرعه علي ما أشوف الأكل ع النار
شادي : إزيك يا إلهام معلش متزعليش
إلهام : أنا كنت مستنياكم وعارفه إنكم هتيجوا تسألوا عليا
ملك : معلش يا إلهام كان نفسي أشوفك قبل ما أمشي
إلهام : هتعزلوا إمتي؟
ملك : بكرا علي آخر النهار
إلهام : معلش بقي أول ما أخرج من هنا هجيلك في بيتكم الجديد
آيه : هتروحيلها إزاي وإنتي بعد إللي حصل هتقدري تخرجي ولا باباكي هيسيبك تروحي أي حته
إلهام : مسير الوضع ده يخلص وهخرج
شادي: بصي أنا جبتلك شهادة الكورس بس مردتش أقول لمامتك أحسن تقول لباباكي وياخدها يقطعها
إلهام : كويس إنك مقلتلهاش دخلهالي بقي من عقب الباب
شادي : خدي بسرعه أحسن مامتك جاية
إلهام : هتوحشوني أوي سلام مؤقت لحد ما أشوفكم
آيه : دي برضوا مش تايبه
شادي : يلا بينا سلام يا تنت
ويمر أسبوع علي هذا الوضع ويقرر الأب أخيراً بأن يفرج عن إبنته ويخرجها من غرفتها ويفتح بابها
إبراهيم : تعالي يا إلهام
إلهام : أنا مش عايزه أروح الحمام
إبراهيم : لأ تعالي عشان تتغدي معانا
إلهام : وهرجع الأوضه تاني
إبراهيم : لأ خلاص مش هقفل عليكي بس لو عملتي أي حاجه تاني مش هقولك إللي ممكن أعمله فيكي
إلهام : طب ممكن نتكلم مع بعض
إبراهيم : وإنتي ليكي عين تفتحي بؤك بعد إللي عملتيه
إلهام : خلاص يا بابا إإللي تشوفوا
وجلست إلهام مع شقيقيها ( إسلام و أحمد ) ودار بينهما الحوار التالي
أحمد : يارب تكوني إتعلمتي من إللي حصلك وتنهدي بقي
إلهام : إسكت إنت ملكش دعوة
إسلام : لو مسكتوش إنتوا الإتنين أنا هقول لبابا وأخليه يحبسكم سوا المرة دي
أحمد : هههههه لأ أبوك بيحبس البنات بس لكن إحنا براحتنا مهما نعمل ولا عمره كلمنا
إسلام : طب يا راجل المفروض تدافع عن أختك وتقف جنبها مش تقول الكلام السخيف ده
أحمد : وإنت بقي مدافعتش عنها ليه لما أبوك حبسها كنت فين ساعتها
إلهام : أنا مش عايزه حد يدافع عني بكرا أكبر وهدافع عن نفسي وهتشوفوا أنا هعمل إيه
أحمد : ههههههه يعني هتعملي إيه
إلهام : إضحك إضحك بس خليك فاكر كلامي
فكرية : يله يا أولاد الغدا جاهز أنا عاملالكوا آكلة حلوه إنهاردة عشان إلهام هتاكل معانا
إبراهيم : يا سلام بتحتفلي بخروجها يعني
فكرية : معلش بقي يا خويا ننسي إللي فات ونبتدي صفحة جديدة
وتبتسم إلهام إبتسامة سخرية وتمتم
إلهام : ها ننسي وصفحة جديدة إبتدوها مع نفسكم لكن أنا ما بنساش ولا عمري هنسي
وإلى اللقاء في الحلقه القادمه