من صفحات الفيس بوك “خد موبايلك وارحل “

متابعة/ اسرار

صديق ليا كان بيصلح تليفزيون عند مركز صيانه بتاع واحد سورى .. راح يجيب الجهاز النهارده من حوالى ساعتين وكان باقى شويه والراجل يقفله وكانت اللحظة اللى ام الشهيد بتتكلم فى التليفزيون والسيسى بكى على كلامها .. واحد زبون تانى جايب جهاز ولسه داخل شتم فى السيسى وقال كلمه ماينفعش اكتبها … المهم صديقى ده قام مسك فى خناقه وكان هايضربه :: الراجل السورى قاله .. يا أستاذ خد جهازك وإتفضل لو سمحت مابصلحش حاجة لناس واطيه !!!! الراجل قاله إنت جاى بلدنا تتشرط علينا بعد ما لمناكم ونزل فيه شتيمه … رد عليه السورى وقاله .. ماهو لولا الراجل اللى إنت شتمته ده ما كان فيه ليكم بلد تلمونا فيها وكان زمانك جاى معانا ندور على مكان يلمنا إحنا وإنت … يا أخى أتقوا الله فى بلدكوا يا أخى ملعون ابو السكر ع الزيت ع السمن .. دا الرسول كان بيمر عليه الهلال والهلالان ولا توقد فى داره نار وحواليه أغنياء مكه بيتنعموا فى الحرير وما قال بلد ظالمه .. يا أخى أتقوا الله فى مصر والله لو عيشتوا ليله واحده من اللى نحن عشناها فى سوريا لتمتنعوا عن الطعام والشراب وتحضنوا ترابها وتقبلوه … يا اخى لو كنت شيلت مثل ما انا شيلت بنت اخى الصغيره 3 سنوات وراسها مقطوع عن جسدها كنت عرفت قيمة ها الراجل اللى بتشتمه وهو معيشك فى أمن وأمان .. يا أخى دى نعمة الامان دى فيه شعوب مستعدة تدفع عمرها بس تعيش فيها ليله إنت بتتنعم بيها ليل نهار . خذ جهازك وفارقنا يا عم الله الغنى عن جنيهاتك ربنا يحمى مصر من شرك وشر اللى مثلك …. ”
الواحد بصراحة عاجز عن التعبير !! الغريب عارف قدر الراجل وقدر البلد وفيه مصريين فى منتهى السوء والغل والجهل !! يارب إستجب لدعاء هذا الرجل بحق ما رأى من اهوال ومصاعب ..