يسعد صباح بلادى
لأنك تاج على جبينى
وضحكه رايقه فى سنينى
وزهره فتحت ليه
فى صحرا . وبير بيروينى
علشان خاطرى . تسامحينى
وإوعى فى يوم . تخاصمينى
لأنه من الصعوبه أقول
يانور عينى. وحشتينى
بأصبح على الوشوش السمر
وشوش شقيانه طول العمر
وكل كلامها حمد وشكر
وطيبه تكفى بر و بحر
بأصبح. عالوشوش البيض
ببسمه. و بمحبه تفيض
ودايمآ. تسعد الأصحاب
ويوم ما أقابلها يصبح عيد
صباحكم. زقزفة عصفور
يسبح. لما شاف النور
ويلقط من غيطانا بذور
ويرجع للعشوش مسرور
صباحكم مالنسيم يظهر
ومدنه عاليه بتكبر
وطاولة عيش بتتمختر
على كتف الشباب الحر
صباحكم. صافى وإبن أصول
بليله سخنه. ويا الفول
وعود جرجير .جميل مغسول
ولمة أسرة أهى بتفطر
صباحكم. على القهاوى يجيب
معسل. ويا شاى بحليب
وصحبه من رجالنا تطيب
وضحكه صافيه بتعبر.
0 228 دقيقة واحدة