جيهان جبر تكتب : أسطورة صوابعى العشرة شمع

بقلم /جيهان جبر عبد الصمد
سؤال واحد عايش العمر معانا وبنلف وندور عليه …ليه شايفين السعادة حلم صعب المنال
ليه الفرح ناسينا مع إنه ممكن يكون عايش معاك وبين إيديك وموش شايفه ولا حاسس بوجوده.
ليه كل واحد فينا حاسس إنه مظلوم ومخدش حقه وإن الدنيا حطت عليه جامد وسرقت منه حظه وفرحه ..
ليه بتحس أنك كامل ومفيش غلط تعيبك مع أنك كلك عيوب ونقرات توجع القلب .
ليه 90% من المتجوزين ميعرفوش معنى السعادة ولا حتى الحب اللى كان وراح .
ليه لما واحدة تعرف إن جوزها بيحب واحدة تانية تقول المقولة المشهورة ( أبو عين زايغة أنا قايدة له صوابعى العشرة شمع )
أقولك على حاجة …أهى صوابعك العشرة دى هى اللى خربت البيوت هى اللى سرقت الأمل وضيعت الحب الكبير .
إنتى ممكن تكونى شايفه إنه موش ناقصة حاجة ..بس هو حاسس إنه ناقصه ألف حاجة .أولها أنك مش بحاسة بوجودة مشغولة بصوابعك العشرة القايدين شمع فى الغسيل والطبيخ والعيال .بس هو محتاج منك خمس صوابع بس تشاركيه بيهم أحلامه ..طموحاته ..أفكاره حتى المجنونة ..شاركيه حياته اللى مخبيها عنك ..شاركيه وجعه ..ألمه ..إسمعى منه شكوته وضحكته بلاش النرجسية وفيلم الصوابع العشرة .
إحساسك إنك كاملة وهو الخاين الغشاش أبو عين زايغة دى بداية خراب البيوت لأنه بيخلق جواه إحساس مميت بالجوع ..حته منه جعانة …حتة من روحة عايزة كتير وخايفة من كتير ولا عارف يخليها تصوم ولا عارف هتشبع إمتى ..زى الطفل الصغير لما يجوع ويخاف بيزن ..بس زن الروح وزن الكبرياء وزن القلب مؤلم جدا .
حاولى تدخلى حياته اللى مخبيها عنك قبل فوات الآوان لأن ببساطة أنتى أول واحدة هتنجرح لما يشبع من غيرك .