كتبت عزة الجراح
جملة قالها الرئيس السيسي في بداية حكمه لمصر وكان يقصد بيها العشوائيات اللي لما إستلم الحكم كانت منتشرة في كل مكان، وكانت للأسف بعض الشعوب بتعايرنا بكده بسبب تعمد خالد يوسف وأمثاله إظهار الصورة دي والتركيز عليها في كل أفلامه تقريباً ،وبالفعل السيسي نفذ كلامه ومسكتش وأبتدي بعدها عالطول في تنفيذ مشروعات تطوير العشوائيات ووفر لأهلها مساكن محترمة فيها كل مقومات الحياة الأدمية ، وكمان كام شهر هيتم إعلان مصر خالية من أي عشوائيات .
أفتكرت الموضوع ده النهاردة وأنا بشوف خبر بناء الهند لجدار عازل علشان يداري العشوائيات وسكانها عن أنظار ترامب أثناء زيارته !!
ولقيت نفسي بعقد مقارنه بين موقف الرئيس السيسي اللي قدر يحل مشكلة العشوائيات وواجه نفسه وشعبه بحقيقة المشكلة وقدر رغم الظروف الإقتصادية اللي كنا بنمر بيها يكسر الجدار ويخلي مصر خالية من العشوائيات ويحقق اللي مقدرتش تعمله قوة أقتصادية كبيرة زي الهند اللي أخفت المشكلة بجدار عازل .
وحسيت بفخر كبير ببلدي ورئيسها وإني كنت صح لما أخترت الراجل ده وهيفضل إختياري له شرف كبير هفتخر بيه طول عمري وأنا بشاور علي إنجازاته وأقوال انا اخترت الراجل اللي عمل كل ده لبلدي .