كثيرا ما نصاب باليأس والحزن خاصه في زماننا المليء، وللأسف الشديد بالتفاهه وإنعدام التفكير وابتعاد الغالبيه العظمي من أفراد مجتمعنا المصري عن القراءه والمعرفه وأيضا الأخلاق والدين ، فأصبحت مواقع التواصل الاجتماعي للبعض من أجل التسليه فقط ..أو اثاره الشائعات والفتن ،وكلمه من هنا وكلمه من هناك تكبر أي اشاعه وسامح الله من أيقظ الفتنه…إذا فكرت أن تقنع طفل من أطفال هذا العصر وتقوله اقرأ.. ينظر إليك نظره وكأنك اصبت بلوثه عقليه ولسان حاله بيقول ايه الكلام اللي بيقوله ده يا خبر ده عايزني اقرأ لسه …ولو فكرت تدخل نقاش مع سن إعدادي وثانوي أنصحك لو بتاخد علاج ضغط تاخده قبلها لأن ضغطك لازم حيعلي… حتسمع اقرا ليه.. وفلان معاه اعداديه وبيغني وبيكسب ملايين ..حاول تقنعه أن فلان ده موجه يبني وحينتهي وان فلان ده استحاله نقدر نقارن فنه بمطرب اتعلم وتعب واجتهد وطلع من الصفر زي منير ولا عمرو دياب ولا محمد فؤاد ولا محمد الحلو مش حيسمع اصلا ولا حيفهم وحيقولك مش شايف مطربين المهرجانات!
شاهدت تقرير لاثنين من طلاب إعلام المستقبل الرائعين ..” محمد رضا” و”شروق محمد” في صفحتهم الجميله ”هنتكلم” صوروه في الشارع عن ”الزوجه المستقبليه ” سألو الشباب تتمني تتجوز مين من المشاهير فكانت الإجابه وبالاغلبيه…”صافينار”! ولما سألو طب ليه كانت الإجابه أفظع.. اصلها حلوه ..اصلها صاروخ. ..كوميدا سوداء بتبين اد ايه شباب المستقبل نفسه يبقي جوز الست الرقاصه…واسفاه علي فلوس المدارس الخاصه والباص والدروس والتيتشر اللي قال والمس اللي طلبت لبن العصفور وضروري بكره يجي.
يعني انت حلمك تتجوز رقاصه عشان علي رأي أستاذ محمد صبحي هوب تطلع لفوق… والتاني عايز يغني من غير تعليم ..والتالث عايز يمثل ولا عمره قرأ أي مسرحيه لأي كاتب ولا عمره شاف أي فيلم عالمي وفهمه ولا قرأ قصص ولا روايات ولا حتي اتدرب ادام مرايه بيتهم ،وعايز يبقي ممثل.. الله اشمعني هو .. وعلي طريقه النجم احمد مكي لما ساق العربيه وقال قلت يمكن بعرف أسوق …يمكن كمان هو يعرف يمثل هي كيمياء بلا قرايه ولا تعليم ولا وجع قلب ..أحد النماذج وهو ابن صديقه لي يبلغ من العمر 17 سنه كل حلم حياته إنه يتجوز واحده أكبر منه تصرف عليه ويعيش مرتاح في فيلا فيها خدم وجنينه كبيره ويا سلام لو كانت اجنبيه. .وياه لو عندها يخت ،ومش مهم سنها لحد تسعين هو موافق.
هل هذا أصبح تفكير أبناء هذا الجيل البحث عن كل سهل وسريع وبدون أي مجهود. الحل ايه معاهم حنتكلم وننصح ادينا بنقول وغيرنا بيخرب. انت تبني ابنك ومجتمع كامل يهده.. أنت تضع البذره لنباتك وغيرك للأسف يدوسه بكل قسوه…طب اقعد اتكلم ساعه وف الآخر اسمع اغنيه واه لو لعبت يا زهر ..يبقي اسكت وأقول حسبي الله ونعم الوكيل .
0 287 2 دقائق