خلاص هتنزل المرة دى بس أعملوا حسابكم فى المرة الجاية مش هتنزل أبدا ( حوار من عنبر العقلاء فى البوسفور )

كتبت شيماء نعمان
كان يظن فى نفسه أنه سيكون من أعاد أمجاد أسلافه العظام أو السفاحين من سلاطين الدولة التى استوطنت منطقة آسيا الصغرى ، ولتحقيق ذلك استعان بجماعة الإخوان وفتح بلاده كمأوى للإرهابيين الهاربين منهم ، وتدخل فى شئون جميع الدول المحيطة بدولته بدءا من سوريا والعراق مرورا بزعزعة أمن ليبيا وتهديد جيرانه فى البحر المتوسط وبحر إيجة مثل قبرص واليونان ثم التدخل فى حرب أرمينيا واذربيجان حول إقليم ناجورنو كراباخ ، ولكن وبعد هذه التدخلات والمساعى التى تهدف لخطف وسرقة ونهب ثروات هذه الدول وقفت أمامه عدة عقبات كئود بددت وضيعت آماله وأحلامه فى الحصول على خيرات وثروات البلاد الأخرى ليبنى على أنقاض نهبها حلمه الكبير فى تكوين دولته الكبرى فى آسيا الصغرى ، وهذه العقبات التى حطمت آماله وأحلامه هى المواقف الحازمة التى تعامل بها كل من الرئيس السيسى والرئيس الروسى بوتين ورئيس الوزراء اليونانى كيرياكوس ميتسوتاكيس ، وفى السطور التالية نعرض حديث تخيلى بين ” قردوغاز ” ووزير دفاعه
” خلاويص ابو الدمار ” والرئيس بوتين يكشف عن حجم المعاناة والفشل والاخفاق الذى وصل له قردوغاز فى جميع الملفات . واليكم الحوار كالتالى : –
قردوغاز : إيه يا أبو الدمار الليلة
بقت جد مش هزار ، قولتلى يلا نلعب بالنار وهخليهالك كلها دمار ونسرق الغاز والنفط من ليبيا ونشتغل هناك كمان فى الإعمار ، وهتبقى العيشة حلوة وكلها بالدولار .
وبعتنا منتخب التكفيريين و الإرهابيين بتوعنا من سوريا على ليبيا ووعدناهم نحاسبهم بالدولار لان الجون باثنين خارج الديار .بس عاوز تهددوا أمن مصر اللى عندها أغنى واهم الأنهار ، وبدأنا نعمل قاعدة بحرية وقاعدة جوية ….فجأة ضربوا لنا المطار لما ركبنا فيها احدث منظومة دفاع جوى أمريكية وخلوها هى والأرض حتة واحدة ومعاها حلمى و أملى طار طار .. لما كملت كمان بالخط الاحمر في سرت و الجفرة . هما قالوا عليه خط احمر بس مش عارف ليه أنا شايفه على طول خط أسود بعد ما سود حياتى وضلمها وضيع أمل حياتى إن إحنا برضه ناخد الغاز والنفط ببلاش زى ما عملنا فى سوريا مع رجالة داعش بتوعنا … إيه الحل يا ابو الدمار مع السيسي والطائرات المجهولة اللى طيرت النوم من عينى وخلت عيشتى هباب فى هباب .
ابو الدمار : مفيش حل عندى ما انت شايف قواتهم شكلها مخيف إزاى فى المناورات أنا لسه سايب الجنود بتوعنا والمرتزقة كمان رجليهم بتخبط فى بعضها وكل واحد بقه تحته بركة مية من الخوف والذعر ، يلا نجرى على حتة تانية الموضوع هناجد مش هزار .. يلا بسرعة عيشنا هنا مقطوع ونسيب المرتزقة لمصيرهم .. مع نفسك يا واد انت وهو وهو اشوفكم أمس على خير .
إيه رأيك يا أبو الخرفان يلا نجرى نسرق غاز قبرص واليونان المشوار هنا طويل وبعيد واحنا معناش دلوقتى إلا صفيحة بنزين وشغلنا الاحتياطى ، ويا رب بس توصلنا بلدنا يا رب قول يا رب .
قردوغاز : نشنت يا فالح ، شورتك طلعت هباب زى وشك ، فرنسا وايطاليا والمانيا وكل الاتحاد الأوروبي زودوهم بالسلاح وحدثوا جيوشهم وبقت قوتهم أضعاف قوتهم قبل كده وبيهددونا كمان بالعقوبات يا فقرى يا ابن الفقرية .
ابو الدمار : معلش عندى خبر تانى وحش برضه ، يا تري هتقدر تستحمله وإلا اجيب الدكاترة الاول قبل ما يغمى عليك زى كل مرة ؟!
قردوغاز : قول كده بس واحدة واحدة ، وإلا اقولك بقى ما هى خربت بجملت المصايب اللى بتيجى من وش أهلك يا بومة انت … ولا أقولك هات الدكاترة وإلا إستنى كده يمكن ما أقعش .
أبو الدمار : مصر واليونان رسموا الحدود البحرية بينهم و قطعوا الطريق على الترسيم المزور بتاعنا مع ليبيا ، وبقت حدودنا البحرية مع اليونان شبر واحد من الشط بتاعنا اللى مفيش فيه غير سمك وقنديل البحر اللى بيلسعك كل ما تنزل تبلبط فى المية و تصيف .
قردوغاز : لأ المرة دى ملهاش حل إلحقنى بالدكاترة السيسي تانى هو الراجل ده ورايا ورايا ، ده أنا قولت أخد تعسيلة نوم وشفت خير اللهم إجعله خير وربنا يستر .. إننى زهقت وقولت أطلع رحلة للمريخ وأبعد عنه لقيت رواد الفضاء بيقولوا إلحق لقينا فى السما حاجة غريبة لقينا خط أحمر بين الشمس والقمر وواحد أحمر تانى بين القمر و زحل فقمت مفزوع من النوم وقلت يا رب اجعله خير
و لقيتك بعدها داخل عليا بالأخبار المهببة دى اللى زى وشك …. أروح منه فين يا أبو الدمار يا اللى بقيت ماشى وراك زي الحمار فى عز النهار ، وكل البلد بقت بتضحك وبتتريق علينا .
ابو الدمار : ما تقلقشى عندى ليك مصلحة لوز كنت مكمرها ليك مخصوص على جنب وجه وقتها.
قردوغاز : قول يا فقرى يا بن الفقرية أنا عارف إن آخرتى على إيديك .
أبو الدمار : فيه رب مولعة دلوقتى بين أرمينيا واذربيجان ، إيه رأيك نبعت شوية من منتخب التكفيريين بتوعنا مع شوية من الجيش ونقف مع أذربيجان ضد أرمينيا وهما ضعاف وهنهزمهم ونبقى أبطال . مش كده وبس ونسيطر كمان على خط غاز بحر قزوين ، وتبقى الأشية معدن والدنيا مزهزه مرة تانية .
قردوغاز : مادام فيها غاز يبقى على بركة الله وتوكل على الله يا بنى يا أبو الدمار ، بس قوللى هو السيسى ممكن يعرف ييجى هنا برضه وإلا إيه ؟
أبو الدمار : إلحق المصيبة والكارثة دى وكله بسبب نبرك والنق على المصالح ، هو انت أبوك أو أمك يقربوا لحد اسمه “شرارة حسن شرارة ” وإلا إيه .
قردوغاز : هو مين ده كمان يا ابن العبيطة انت هتوهنى تانى كل شوية وإلا إيه ….إيه اللى حصل قول ما انت وشك فقر أصلا ، ومفيش مصلحة قولت عليها ومشيت صح و على خير للآخر .
ابو الدمار : لا ما تخدش فى بالك
اسمع يا أبو الخرفان اولا السيسى .
قردوغاز : ( مقاطعا له فى الكلام) السيسى تانى ، هو فيه ايه يا ابنى …. إرحمونى بقى ده أنا كل ما بنام ما بحلمش غير حلم واحد من خمس شهور ما بشوفش فى الأحلام غير خطوط حمراء خطوط حمراء خطوط حمراء .. وكل ما ادقق و أتأمل فيها ألاقيها بتسود ويغمق لونها زى عيشتى السودة اللى عايشها معاكم هنا يا ابن العبيطة .. هو هيجى هنا وإلا إيه.
ابو الدمار : لأ يا أبوالخرفان ده هيبعت لك فى البحر الأسود قطع بحرية تعمل تدريبات ومناورات مع أسطول روسيا .
قردوغاز : أيوة هو الأسود هو الأسود .. كانت ناقصة الأسود كمان سيبت لهم البحر المتوسط وبحر إيجة يجيلى هنا كمان فى البحر الأسود … آه آه هو الأسود ، كده الحلم المنيل ده اللي كل يوم اشوفه وأقوم مفزوع من النوم وخايف وألاقى الفرشة مستطرية كده معرفش من ايه كأنى رجعت لأيام الابتدائية …أيوة كده الحلم إتفسر أهو ، روح يا شيخ يلعن ابو اخبارك السودة اللى زى وشك يا بومة.
أبو الدمار : لأ اصبر بس وإسمع البلوة التانية الكبيرة .
قردوغاز : وهو لسه فيه تانى قول يا بومة قول ، بس هات الدكاترة الاول ويشوفوا حل أنا كل ما أسمع اخبارك الطين دى بلاقيها بتبرد معرفش إزاى ويغمى عليا بالايام … إلحقنى يا بنى بالدكاترة وهاتلى معاهم فحلين بصل صعيدى مصرى هما دول اللى بيفوقونى بسرعة . هو ده كل اللى استنفعنا بيه من مصر ومن عند السيسى ( بصل صعيدى علشان أفوق وبس ولو كلته يوجع لى بطنى كأنه جندى مخلص ومطيع للسيسى ) مش زيكم يا بهايم كل ما اطلب حاجة تقولوا مش قادرين .
أبو الدمار : بوتين رفض إن إحنا نجيب قوات من عندنا و نروح بيها فى حرب أرمينيا واذربيجان.
قردوغاز : شكلى بقى وحش اوى قدام الشعب كل المصالح ضاعت ، وكمان إحنا قولنا فى الإعلام والصحافة إننا رايحين وبدأنا نبعت مرتزقة وجنود من جيشنا .. أعمل إيه بس ، إطلب لى يا أبنى الرئيس بوتين على التليفون أستسمحه فى المصلحة دى .
قردوغاز لبوتين : أيوه يا قيصر الروس ، ينفع كده تحرجنى قدام شعبى وأطلع قدامهم قفة وكيس جوافة وراجل أى كلام ما بيعرفش ينفذ أى كلمة يقولها ، وكلهم دلوقتى بيقولوا عليا حنفى أو المعلم حنفى ، وكل ما أمشى أو أعدى فى موكب يندهوا عليا ويقولوا ( حنفى أهو حنفى أهو حنفى أهو ) وفى الآخر أعرف إن حنفى ده راجل هزء و خرنج مكنش بيعرف يمشى كلمة على أهل بيته ، ينفع كده ويرضيك كده يا أبو الزمل والمصالح كلها .
بوتين : دى مصلحة ليك يا عبى .. عبيط يعنى
قردوغاز : مادام فيها مصلحة أنا معاك برنس قول يا عمى وعم الناس كلها ، قول يا عم القياصرة كلهم .
بوتين : أنا بعت قوات حفظ سلام من عندى أنا بس وخلصت الحرب دى بكلمة وقسمت إقليم ناجورنو كراباخ بينى وبينك قسمة الحق والعدل أنا هخده ليا كله إلا حته منه .. إصبر الحتة اللى منه بتاعتك دى هتخليك معانا نسيطر على خط غاز بحر قزوين وكمان هعملك خط غاز جديد من عندى يعدى عليكم مباشرة لأوروبا وتفيد وتستفيد وهترزق معاك من وسع يا أبو القرود والخرفان وتبقى العيشة نغنغة وتمام فى تمام .
قردوغاز : خلاص وأنا موافق وعلشانك كلمتى برضه ( هتنزل المرة دى بس اعملوا حسابكم المرة الجاية مش هتنزل أبدا )..
إيه ده هو أنا بقيت حنفى بجد وإلا إيه .. آه إيه يعنى اعيش حنفى أو أبقى حنفى بجد أو حتى أبقى ابو الخرفان حتى ..آه أيوة كده المصلحة دى تمام .. اعيش حنفى بس أعرف أسرق غاز بامتياز .. آه أنا حنفى أنا المعلم حنفى بس ترزق بأى سبوبة ..
انا حنفى يعيش المعلم حنفى ..
يا ااااااا يعيش يا ااااااا يعيش ..