اللى يجى بالساهل يروح فى الساحل

كتبت/جيهان جبر عبد الصمد
الكلمة دى عجبتنى أوى مش عارفة قريتها فين ولا سمعتها من مين ….المهم أنه فعلا اللى بييجى بالساهل يروح بالساحل …
الأسبوع اللى فات كنت معزومة فى الساحل شوفت مصر تانية غير اللى عايشينها ..وشفت ناس تاتية خالص غير اللى بنشوفهم كل يوم ..شفت ستات وبنات زى القمرات بأكبر كرنفال لأستعراض المايوهات ( السينيه ) وطبعا كل واحدة معاها الكلب بتاعها بكامل زينته وإكسسوراته ..يعنى بيستعرضوا الكلاب والقطط .شوفت شباب زى الورد بفورمة الساحل اللى بيشتغل عليها سنة كاملة وبيصرف عليها ألوفات ..
شوفت كافيهات ومطاعم الحجز كومبليت مفيش مكان لأى حد .كل أسرة بعيالها بكلابها وقططها .عيشة تانية وعالم وردى ..متقولش دى مصر خالص.
كل ده كوم واللى هقوله دوقتى حاجة تانية خالص..كنت معزومة على حفلة شيرين عبد الوهاب طبعا التذكرة بتبدأ من 500 جنيه الى 1500 جنيه وفى السوق السودة 2000 جنيه ..الحفلة كان حاضر فيها من 10 الى 20 الف بنى آدم ..يعنى تقريبا 30 مليون جنيه ويمكن أكتر ..
بعد الحفلة كل واحد بيروح بيته لأنه تعب من البحر والكافيهات وكرنفالات القطط والكلاب بيروح مقتول يادوب ينام ده الانسان الطبيعى لكن اللى مش طبيعى وشفته بعينى أن معظمهم بيفتح الفيس وبعد مايشير صور القطط والمايوهات والكلاب يبتدى يعيش الحالة ……..الغلابة ياريس…مصر رايحة على فين …الناس بتكح تراب ياريس…الناس بتاكل من الزبالة …أم حسب الله باعت شعرها وكليتها عشان تأكل عيالها …أم محمد بتاكل من الزبالة ….
بالله عليكم دول ناس ممكن تصدقهم أو حتى تحترمهم…أنا وصلت لقناعة أنه عمرى ماهصدق حد بيقول الغلابة ياريس وأولهم المخرج خالد يوسف اللى عايش بأربع شقق فى الفورسيزون بسان أستفانو وغيره كتير أوى .
ناس مش ناس ولاحاسة بالناس .