“” قصة اصحاب السبت.””
كتبت عزة الجراح
قصة اصحاب السبت وتحليلها بمنطق عصرنا
عشان لو تدبرت القصه بعقلية اليومين دول ممكن تحس انهم معملوش حاجه غلط اوي يعني.
ربنا قالهم ماتصطادوش يوم السبت والنَّاس قاعده مفيش سمك طول الأسبوع ومش بيجي سمك غير يوم السبت فهم معملوش حاجه غير انهم حطوا الشبك الجمعه بليل ولموا السمك الحد الصبح يعني هما بنفسهم ماصطادوش يوم السبت، تحس عادي يعني هما عملوا ايه
اكيد في شيوخ عندهم قالولهم يجوز
مدام انتم بس رميتوا الشبكً
وناس منهم قالولهم واحنا مالنا
واكيد سموا الصيد بتاع السبت ده حاجه غير الصيد
لو فكرت فيها بعقلية الفهلوة بتاعت اليومين دول ممكن تلاقي انهم معملوش حاجه
بس ده ربنا غضب عليهم و لعنهم يعني أخرجهم من رحمته وجعلهم قردة خاسئين.
كل ده عشان لفوا وداروا حواليين امر ربنا سبحانه وتعالى ، تحايلوا في الدين عشان يحققوا غرضهم وفاكرين انهم خرجوا من الحرمانيه.
——
أد ايه في مننا أصحاب سبت،
أد إيه في ناس النهارده عايشه بعقلية المحلل بتلف وتدور الخمرة بقت مشروبات روحيه، الرشوه بقت إكراميه، الربا فايده ،الإنفلات و الإنحلال حرية ،
واللي مش بيصلي يقولك الدين معاملة، واللي يصلي الجمعه بس ويقولك مش احسن ما أصليش (كأنه بيمن علي اللي خلقه بطاعته)
، واللي بيجمع الصلاة كلها قبل ما ينام واللي يروح صلاة الجمعه على الصلاه وربنا أمر إنك تحضر الخطبة والصلاة، والحجاب اللي بقي سبانش واللي واللي واللي،
بصراحه حالنا صعب ومش كويس ويمكن يكون ده سبب حالنا كافراد وحال الامه كلها.
المصيبه ان يكون ربنا غضبان علينا او حتى خارجين من رحمته واحنا مش حاسين وفاكرين اننا من أولياء الله الصالحين.
احنا بجد محتاجين نعامل ربنا كـ رب عظيم يأمر فيطاع-
ربنا بيقول مالكم لا ترجون لله وَقَارا-
وبيقول وما قدروا الله حق قدره
وبيقول ولو انهم فعلوا ما يوعظون به لكان خير لهم،
