حتى لا ننسى

كتبت /جيهان جبر عبد الصمد
فاكرين ياجماعة لما الطيارة الروسية وقعت فى المجال الجوى المصرى وكلنا لبسنا فى الحيط وبقى الشغل الشاغل أزاى نبيض صفحتنا من جديد ..وفاكرين بعد ربع ساعة من أسقاط الطائرة إى اللى حصل …تعالوا نفتكر
الأمارات أعلنت حظر الطيران لمطار القاهرة.
روسيا لبستنا فى الحيط ومنعت السياحة بأشد العبارات وأقصاها .
أوباما الله ينتقم منه شن الحرب العالمية التالتة والرابعة علينا وعلى بلادنا
طبعا بريطانيا وسواد القلب الازلى لمصر والمصريين .
بس كان الأصعب والأقسى الموقف الروسى…. والمهين أكتر حجم الأذلال والتعنت اللى شفناه عشان ترجع الميه لمجاريها وترجع السياحة الروسية من تانى ..،
بس فى الأول لازم نعرف أن مصر بلد سياحى يعنى تلت الدخل القومى يعتمد على السياحة ..إحنا 100 مليون بنى آدم يعنى 33 مليون عايش برزقه على السياحى ..لما تيجى أنت تضرب السياحة يعنى البلد بتوقع بالتدريج .
وتعبنا من الكلام ياجماعة السياحة مش روسيا ..يعنى الروس مش طوق نجاة ما إحنا عارفين اللى فيها ..الروسى مش غنى للدرجة دى ويادوب بيقوم السياحة شوية ..مفيش داعى نقتل روحنا على الروس .
أمبارح كنت فى مكتبة أسكندرية كل يوم بشوف أجانب كتير وسياح من كل دول العالم الا روسيا…بس أمبارح كان يوم مميز لان شفت بالفوج اليابانى للمرة العاشرة بيزور مصر .،قضيت معاهم ساعتين بقول لواحد فيهم أنت مش خايف لما تيجى مصر أى عمل إرهابى غير مسئول …قالى أن أخته أصيبت فى برشلونة يقصد أسبانيا والحادث الأخير ..وهو شخصيا أصيب فى بلجيكا من سنتين ..وحتى قاللى أنا لسه عايش وبحب مصر وناس مصر .
عايزة أقول لو ركزنا شوية على اليابان وكوريا والهند وشرق آسيا السياحة هترجع أحسن من الأول ..الدنيا مش هتوقف على روسيا…..ولا حتى الكرملين نفسه..إحنا فراعنة ولايقدر علينا الا رب العالمين .