أحنا ليه كده ؟
بقلم:جيهان جبر
امبارح كنت بسأل نفسى سؤال كان محيرنى أوى ومش لاقية أى تفسير ..
هوا احنا ليه بنبقى فترات فى حياة بعض ؟ يعنى ليه انا ببقى فترة فى حياتك وانت فترة فى حياتى ؟ ليه ماكنش كل حياتك وانت كل حياتى .؟
يعنى ليه ساعات بنعرف ناس ونقرب منهم أوى وبعد فترة بنبعد عنهم أوى ويبقوا اغراب عنا ..ليه ناس تمشى وتيجى ناس تانية تاخد مكانها وغلاوتها وفرحتها ..
ناس بتروح وناس بتيجى ..ناس تنور وناس تنطفى ..ناس فى فترة بيكونوا كل حاجة وفى لحظة يبقوا ولا حاجة ..بس تعرفوا سبحان الله فى وسط الزحمة دى بتلاقى واحد بس هو اللى فاضل معاك ..دايما قريب منك ..دايما خايف عليك هوا على طول ساكت ومش ظاهر ونوره خافت بس هو اكتر واحد شايفك وحاسس بيك . ممكن يكون مش ظاهر فى الصورة بس الوحيد لما تحس بالوحدة وتلاقى نفسك تايه فى الدنيا بيجرى عليك ويدلك على الطريق ويخليك تشوف الدنيا بعيونه هو .
لو كنت شايف أن فى أكتر من سبب لناس تبعد عنك ..تاكد أن عنده مليون سبب تخليه يقرب منك .هو على طول معاك مهما بعدت عنه وفاكرك مهما نسيته ..
…طوبى لمن يحمل مفاتيح سعادتى وآبداٌ لن آراه…
…طوبى لى بهكذا قدر قادنى اليه مرة وسرقنى منه مرات
